la anancin e la mum
By tijlan
la anancin e la mum
puzuku ki, lo se cmene be { anancin } nakni cu xabju lo djamaika daplu -
la anancin goi A ta'e cenba lo ka ce'u remna gonai jukni kei gi'e ckaji lo ka palci -
va tu'a A, xabju fa lo te makfa ninmu be me'e { mu } -
la mum goi M to'e nelci lo vo'a cmene gi'e roroi djica lo nu lo drata cu valsi tarmi vo'a -
ku'i roda te cmene fi { mu } ja'e lo nu lo dei ninmu cu ru'i to'e se pluka
ca lo cerni ku, A pa'o lo kevna be lo M zdani bitmu cu zgana lo ragve -
M sepi'o lo barda tansi ca'o jicla tu'a lo cizra srasu -
co'a lo nu danmo lo tansi kei M mo'iga'u lafti lo grana gi'e cusku lo makfa jufra no'u { re'e roda poi bacru { mu } cu ca la'e dei morsi binxo eicai } -
A noi co'i tirna ra cu cisma do'e { u'asai - da'i fi lo nu jitro tu'a ra cu prali uiba'a }
A mo'i zvati lo klaji be fe'eru'ine'a lo rirxe be'o noi ro vitke be lo zarci panka cu klama fo ke'a -
co'iku bu'u lo mlana A zbasu 5 derxi be lo titla patlu gi'e co'a denpa -
zo'a klama fa lo fetsi speni cei bu'a datka -
A { coi doi io blabi melbi speni datka - peiro'i } -
lo bu'a datka { coi anancin - ju'a uinainai - pei doi } -
A { ge'e ... y ... } sei na'e gleki flira { li'adai mi ba'o crepu lo titla patlu - ku'i mi cmaci ruble, ja'e lo nu na kancu kakne - e'o.oiro'a ko kancu lo derxi } -
lo datka { i'a } sei co'a kancu { pa - re - ci - vo - mu } -
sai co'i lo mu'e bacru { mu } kei lo datka cu salpo farlu binxo lo morsi -
A lo go'i cu mulno citka -
babo ke'u ru'iku zutse lo klaji mlana gi'e denpa -
zo'a klama fa lo bu'a ractu fi'o kerlo lo clani noi se desku -
A { coi doi io clani kerlo melbi speni ractu - peiro'i } -
{ coi anancin } -
A { ju'i doi xendo, mi ba'o crepu lo titla patlu - ku'i mi menli ruble ja'e lo nu na kancu kakne - e'o.oiro'a ko kancu lo derxi } -
lo ractu { oidai.uu } sei co'a kancu { pa - re - ci - vo - mu } -
sai co'i lo mu'e bacru { mu } kei lo ractu cu salpo farlu binxo lo morsi -
A lo go'i cu mulno citka
A fau lo zu'o satre lo vo'a tisna be co'a betfu cu za'o zvati ra -
zo'a cadzu fa lo bu'a pidjono noi se tuple lo skarpinki melbi -
A { coi doi io skarpinki melbi speni pidjono } -
lo pidjono { coi anancin - do ca mo } -
A { y ge'e doi } sei na'e gleki flira { ba'acu'i mi'e bebna oi, mi ba'o crepu lo titla patlu gi'e ku'i na'e kakne lo nu kancu tu'a lo du'u xo kau derxi - se'anai doi xendo e'o ko seba'i mi kancu } -
lo pidjono { i'a.fi'i } -
sepi'o lo skarpinki melbi tuple cu plipe cpare pa lo patlu derxi -
ta'i lo zu'o plipe muvdu cu co'a kancu, secu'u { pa - re - ci - vo - su'i ti } -
A oidai steba gi'e cusku { doi pidjono, lo do kancu tadji cu cizra } -
lo pidjono { uacu'i - je'e ai jai rapli } sei bi'u co'a kancu { pa - re - ci - vo - su'i lo mi se cpana moi } -
A { na'i.oi - i'enai tai kancu tadji } sei fengu co denci mosra -
lo pidjono noi xendo ku'o { u'u - doi io anancin ai.e'o mi za'ure'u troci } sei bi'u co'a kancu { pa - re - ci - vo - ja'o sumji ri lo mi cabna se zutse moi } -
A fi'o flira lo xunre cu fengu krixa { o'onaicai bebna u'e.ionai pidjono - ju'icai, ei kancu tai la'e di'e - pa - re - ci - vo - mu } -
sai co'i lo mu'e bacru { mu } kei A salpo farlu binxo lo morsi
fa'o